Дуннелэн кылдэмез

Та дуннелэн интыяз нырысь ик неномыр но вылымтэ: котырак одӥг ву гинэ. Инмар отӥ бадӟым пыжен уяса ветлэм. Огпол Инмар, «кызьы али мон татчы дунне кылдытом?» шуыса, Шайтанэз ӧтем. Косэм сое: «Тон мын, та ву пушкы пырыса, пыдэсысьтыз мае ке шедьтӥд, ымыныд потты!»

Шайтан ву пыдсы лэзькыны кутскем. Мур вулэн пыдэсаз ненокызьы но уг вуы, пе. Туж кема дыр ортчыса, Ракен пумиськем. «Кытчы мынӥськод?» — юа солэсь Рак. «By пыдсы васькисько. Отысь мар ке сюриз ке, ымыным потто»,— шуэм Шайтан. «Mae малпаны кутскид! — шуэм Рак.— Мон та вуын дас кык ар улӥсько ини, но неноку но солэсь пыдэссэ адӟеме ӧвӧл на».— «Ойдо ӵок али, лэзько»,— шуэм Шайтан.

Туж но туж кема васькыса, Шайтан мырдэм вулэн пыдэсаз вуэм но татысь луоез ымаз басьтыса ӝутскем.

Инмар луозэ ымысьтыз пазьгыны косэм. «Одӥг гизьызэ но ымад эн кельты!» — шуэм. «Малы меда та Инмар одӥг гизьызэ но ымам кельтыны уг лэзьы?» шуыса, Шайтан ымысьтыз луозэ чиста пазьгымтэ.

Соку ву вылэ пазьгем луо будыса-будыса музъем луэм. Шайтанлэн ымаз кельтэм луоез но будыны кутскем. Инмар, Шайтанлэсь пыктылэм бамъёссэ адӟыса, «малы тон мынэсьтым ӧд кылзӥськы, одӥг гизьызэ но кельтытэк кушты шуэм вал ук?!» верам но Шайтанэз ымысьтыз музъемзэ куштыны косэм.

Та Шайтанлэн ымысьтыз куштэм музъемез ӧй ке луысал, вань дунне вылын музъем таба кадь ӵошкыт луысал. Нюкъёс-гопъёс но, бадӟым гурезьёс но ӧй луысалзы.