Инмар но писэй

Инмарлэн ярдурын пыжъёсыз сыло вылэм. Но соос огез бӧрсьы мукетыз пась луыны кугскиллям. Нош кин пась карылэ — сое адӟыны но, тодыны но уг быгато, пе. Пӧртэм пӧйшуръёс изъянтӥсез кутыны турттӥллям но шедьтӥллямтэ. Огпол чакласькыны Писэй мынэм. Нокин но оскымтэ, талэсь мар ке пӧрмоз шуыса, малы ке шуоно, соку Писэез ултӥяло, пе, вал — Тигрлэн нырысьтыз усем маке, пе, шуо вал. Нош пыжъёсты Шыр пась карылэ вылэм. Писэй сое кутыны быгатэм. Сыӵе ӟеч уж лэсьтэмез понна, Писэйлы Инмар шуэм:

— Ӟеч муртъёслэн тӧр шоразы пук, небыт тушаказы кылльы.

Майбыр али Писэйлэн улэмез: кылле со тушак вылын,шуныт солы толалтэ но, гужем но.