Шӱлы дон морен

Ӹленыт ылын перви Шӱлы дон Морен. Морен ныр мычкы кыдалеш. Ныр покшалны Шӱлым вӓшлин шагалеш. Морен тӹдылан попа:

— Айда, Шӱлы тос, тӓнгашен анжена! Кӱ чӹнь кыргыж кердеш?

Шӱлыжы Моренлан пелешта:

— Изиш варарак тӓнгашена! Мӹнь качкаш келдалам. Тӹнь вычал!

— Яра, вычалам, — манеш Моренжы.

— Шӱлы йӹлерак вӓтыжы докы кыдалеш. Токыжы пырымыкы попа:

— Тӧкаэм, айда, йӹлерак выргеметым чи, кена Морен доно тӓнгашаш! Тӹнь нырын ик вуеш шагалат. Мӹнь вес вуешыжы шагалам. Морен кыдал толмыкы, «Мӹнь тишты ылам!» манын колты.

Коктын ӹнде кеат. Морен докы шомешкы, Шӱлы вӓтыжым нырын ик вуешыжы шагалтен кода. Шкежы Морен докы кыдалеш. Морен докы миа дӓ попа:

— Вот, Морен тос, мӹнь качкынат тольым. Ӹнде кешна нырын тӹ вуйышкы. Тӹшец кыргыжаш тӹнгалына.

— Яра, Шӱлы тос, тӹнь семынет лижы. Кешнӓ тӹ вуйышкы. Тӹшец кыргыжаш тӹнгалына, — манеш Моренет.

Коктын ныр вуйышкыла кеат. Миэн шот дӓ тӓнгашаш шагалыт.

— Ик, кок, кым! — Шӱлы сӹгырал колта.

Морен, ныр вуй гӹц тӹргештен тӓрванен, вес вуйышкыла пикшла чӱкта, шайыкылаат ак анжал. Кыдал миа нырын вес вуйышкы.

— Мӹнь тишты ылам! — манын, Шӱлы вӓтет тӹшты сӹгырал колта.

Моренет цӹлт ӧрын. Нигыцеат ынгылен ак керд: кыце Шӱлы тӹдым анзылтен кердын?

Шӱлы вӓтет манеш:

— Айда ӹнде вес вуйыш кыргыжына! Ик, кок, кым!

Морен ныр вуй гӹц тӹргешта дӓ, пырак веле шагал кодеш, пиш пӹсын кыдалеш. Вес вуйыш кыдал миа, анжа — Шӱлы выченат шалга.

— Мӹнь тишты ылам! —манеш.

Морен нигыцеат ак ынгылы: кыце мыльы Шӱлы тӹдын гӹц пӹсын кыргыж кердеш? Bapa тӹды Шӱлылан манеш:

— Айда эче ик гӓна кыргыж анжена!

— Малын, эче ик гӓна веле агыл, шукы гӓна кыргыж кердына! — манеш Шӱлыжы.

Эчеат коктын тӓнгашаш шагалыт.

— Ик, кок, кым! — сӹгырал колта Шӱлы.

Морен эчеат пӹсын вӓржы гӹц тӓрвана. Кыдалеш, шайыкыжат ак анжал. Кыдал миа нырын вес вуйышкыжы, тӹшты Шӱлы шалгалтаат.

— Мӹнь тишты ылам! — манын, Шӱлы вӓтет сасла.

Морен лач ороды ганьок лин. Нигыцеат Шӱлым анзылтен ак керд. Тӹды шӹмлу шӹм гӓна ик вуй гӹц вес вуйыш кыдал сӓрнен, Шӱлым нигыцеат сӹнген кердде, моч гӹц кен. Пикш гань кыдалыштеш гӹнят, Шӱлым тӓнгашымашты ак сӹнгы. Тенге Шӱлок сӹнгышеш кодеш.

Тошты мары такеш попыде: хоть-кыштат ял доно агыл, ыш доно веле сӹнгат.