Тувоня

Срхкась тувонясь кемгафтува пурхцканзон мархта церянянь базару, ваны: каршезонза сай врьгаз, и сон корхтай тувоняти:

— Тувоня ялгай, ков молят?

— Молян церянянь базару.

— А монь сявсамак?

— Тоса-тоса ули пяк кели лотка, и сияне тон аф ётават.

— Тонь кемгафтува пурхцце, и то ётават, а мон шава прязень мархта ёфси ётаван.

— Аде, кда молят, — отвечась тувонясь. Мольсть, мольсть и ваныхть: каршезост сай сяваня.

— Тувоня ялгай, ков молят ялгатнень мархта?

— Мольхтяма базару.

— А монь сявсамасть?

— Эх, тоса пяк оцю лотка ули, и тон сияне аф ётават.

— Тонь кемгафтува пурхцце, и то ётават, а мон шава прязень мархта ёфси ётаван.

— Ну, аде тонга.

Мольсть, мольсть и ваныхть: каршезост сай офта.

— Тувоня ялгай, ков молят ялгатнень мархта?

— Минь мольхтяма базару.

— А монь сявсамасть?

• Сяфтядязь, но аньцек ули пяк кели лотка, и тон турксканза аф ётават.

— Тонь кемгафтува пурхцце, и то ётават, а мон шава прязень мархта ёфси ётан.

Молихть и ваныхть: сай каршезост келазь.

— Тувоня ялгай, ков мольхтяда?

— Церянянь базару.

— А монь сявсамасть?

— Аде, но аньцек тоса-тоса ули пяк кели лотка, и тон вельфканза аф комотеват.

— Тонь кемгафтува пурхцце, и то ётават, а мон шава прязень мархта ёфси комотян.

Пачкодсть ся лоткть трвас, конань туркс эряви сембонди комотемс.

— Ну, врьгаз, комотть ина!

Потась, потась врьгазсь... Кодак комоти — и тусь алубрят лоткти.

— Тяни тон комотть, сява!

Потась, потась казась и кодак кармась комотема, сявок тусь врьгазть мельге.

Офтсь да келазсь ёрасть ётамс, но сембе сяка алу ваясть.

— Тувонясь савор, савор ётась лоткть туркс и пачкодсь церянянь базару. Сон якась базарть келес, симондсь-ярхцсесь и мекивок ётась лоткть туркс куду.

— Офтсь лотка потмаксста мусь нешке кудня, синнезе и кармась ярхцама медьта. Инголи изь ярхцав сяс, меc пяк ламоль мешта. Сявозе офтсь нешке куднять и колмоксть чёпафтозе ведти. Сявась кизефнесы офтть:

— Офта ялгай, мезьда ярхцат?

— Медьта.

— Минь андсамасть?

— Анттядязь.

Тусь офтсь лоткть кувалмова, аф ламос мольсь, тага фкя нешке кудня мусь.

— Вага тейнтьке кандонь медь.

Офтсь сявозе нешке куднять лангаксонц и ёрдазе бокти.

Кодак ёрдазе, лисендсть мешне и давай пупсемс сембонь: и келазнек, и врьгазнек, и казанек, и офтонек.

Няйсазь, аф тефт — и сембе комотнесть ведти, но ведьсовок нярьснон эса пупсесть мешне.

Кяжиясь офтсь, сявозе нешке куднять и пяшкодезе ведьта. Мешнень ламосна кулсесть. Сяда меле нешке куднять синнезе и андозень сембонь медьта.

Ярхцасть топодемс и кармасть шутендама.

Сяда меле мадсть сембе ваймама. Казанять удомац изь са. Сон варжакстсь нешке куднять потмос, тоса нинге ули аф лама медня. Офтсь пяк кемоста матодовсь. Сяванясь ламос арьсекшнесь, мезе ба тиемс офтть мархта, но курокста ашезь арьсев мезевок. Кргазе нешке куднять потмаксста потмаксста лядыкс медть и ушедсь офтть пулалонц вадендема. Мешне марязь медь шинеть и сембе цямбафтсть офтти. Комотсь удома вастста офтсь и кяжень пачк давай ялганзон эса сязендемс.

Сязендезень сембонь и ськамонза лядсь лоткть потмос.