Ривезть псакать

Весть псака лись вирьга якамо. Вана каршозонзо ривезь понгоны и корты тензэ: тонть леметь кода? Псака ёвтась тензэ: монь лемем Кот Иваныч; тонть кода леметь? — Лиса Иваныч, ёвстась тензэ ривезь. Мейле ривезь мерсь тензэ: дай, Кот Иваныч, вейс’ эрямо — Давай! мерсь псака. Тусть эрямо псакань кудос.

Весть вана ривезь тусь тошнанзо ютавтомо, вирьга якамо. Яки сон вирьга, каршозонзо понгоны овто. Овтось мери тензэ: мон тонть, ривезь, сэвдян! Ривезь мери тензэ: монь мирьдем ули, Кот Иваныч; тон сонзо пильг’ алдо сэксэдензэ як а аштятъ! Овто тандадсь да ардомо тусь. Мейле ривезень каршо вергез понгсь и мери: мон тонть, ривезь, сэвдян! Ривезь мери тензэ: монь мирьдем ули, Кот Иваныч; тон сонзо пильг’ алдо сэксэдензэ як а аштят! Вергез, не валтнэнь марязь, пек тандадсь. Мейле ривезень каршо понгсь нумоло и корты: ривезь, мон тонть сэвдян! — Аштека, ужо, нумоло пар очи, ве вал ёвтан тенть: монь мирьдем ули, Кот Иваныч; тон сонзо пильг’ алдо сэксэдензэ як а аштят! Сон не ватнэнь марязь, эзь содак прянзо ков тееме: мезе вiйсэ чiеме тусь.

Чiйсь, чiйсь, муинзе овто маро вергезэнь. Кармасть вейс’ арсеме, кода бу тенст Кот Иванычень неймекс. Вергез мери: мон молян бука салан да пир тейдянок: тердсынек ривезень мирьдензэ маро. Сестэ Кот Иванычень гак нейсынек. Мон, нумоло мери, молян курш-карш пурнан. Овто мери: мон молян, медь салан.

Вана сынь весемест тусть истя: вергез бука салась, нумоло курш-карш кандсь, овто нешкть яжась, медь кандсь. Тейсть пир. Овто тусь ривезень мирьдензэ маро тердеме. Сась овто вальм’ алов, кармась сейреме: ривезь, а ривезь! айдо миненек симеме, ярсамо. Ривезь мерсь: вана шлятанок, нардатанок. Овто тусь мекев. Сон кiява моли, моли, вачты удалов — а сы ли, мери, Кот Иваныч? Сась ялганзо вакс. Учить, учить, — а сыть. Мейле вергезь тусь тердемест. Сась сон ривезень вальм’ алов, кармась сейреме: ривезь, а ривезь! айдо миненек госькс. Ривезь мерсь: вана карситяно, тапарятано. Вергез тусь. Сон кiява моли, удалов вачты — а сы ли, мери, Кот Иваныч? Сась вергез ялганстэнь. Учить, учить, — а сыть. Мейле нумоло тусь. Сась ривезьнень, кармась сейреме: Ривезь, а ривезь! айдо миненек госькс. — Ван’ орчатано, карятано. Нумоло седе курок тусь. Кiява моли, моли, удалов вачты. Кода сась, ялганстнэнь ёвтась: орчить, карить! мери. Овто куйсь столба пряс, вергез столбанть алов, пенге кастёр алов кекшсь, нумоло курш-карш алов кекшсь.

Кода ривезть псакат састь, псака ваны — овто столба прясо. Кода кирнавты столбанть пряс! Овто да тосто прянзо лангс эшкизе — костёронт лангс прась! Костёронть потсто лись вергез; сон чалгась курш-карш лангс; курш-карштн’ алдо лись нумоло. Сынь, эсь пряст апак помня, кона ков, кона ков сралесть.

Ривезть псакат сэвизь букаст да тусть кудов.