Гурь сен, нурдонязе
Эрясть-ащесть ляй омбокса атят-бабат, а синь ульсь ёмла цёранясна. Стясь шобдава цёранясь и корхтай алянцты:
— Аляй, тихть нурдонят! Аляй, тихть нурдонят!
Тись аляц нурдонят, а цёранясь корхтай тядянцты:
— Тядяй, патть цюкорня! Тядяй, патть цюкорня!
Панць тядяц цюкорня, щафтозень цёранясь гальцянзон да и тусь курькснема.
Озась нурдонянязонза и морай:
Гурь сей, нурдонязе!
Гурь тов, поласкязе!
Медь ламбама цюкорнязе!
Гай, тула мандонязе!
Лиссь каршезонза нумолнясь[1] и корхтай:
— Вай, цёраня, кодама мазы мороняце. Морак тейньге.
А цёранясь корхтай:
— Озак элезон, мораса тейть моронязень.
Озась нумолнясь цёранять эльс, а цёранясь мярьги:
— Тяни конить сельмонятнень.
Нумолнясь конезень сельмонзон, а цёранясь морай:
Гурь сей, нурдонязе!
Гурь тов, поласкязе!
Медь ламбама цюкорнязе!
Гай, тула мандонязе!
Гай!
Гай!
Гай!
Гайнефтезе коня ланга нумолнять, путозе нурдоняв, сонць тага морай. Лиссь каршезонза келаськясь.
— Цёраня, цёраня! Пяк ни мазы мороняце, морак тейньге.
— Мораса тейтьке, озак элезон да конить сельмонятнень.
Озась келаськясь элезонза, конезень сельмонянзон, тусть курькстома.
Цёранясь морай:
Гурь сей, нурдонязе!
Гурь тов, поласкязе!
Медь ламбама цюкорнязе!
Гай, тула мандонязе!
Гай!
Гай!
Гай!
Гайфтезе коня ланга келаськять мандоняса, путозе нурдоняв, а сонць тага морай.
Тяни лиссь каршезонза кяжи пона врьгаскясь.
— Вай, вай, цёраня, кодама мазы мороняце, морак тейньге.
— Мораса тейтьке, озак элезон да конить сельмотнень.
Озась кяжи пона врьгазсь цёранять эльс, конезень пиндолды сельмонзон, тусть курькстома. Цёранясь морай:
Гурь сей, нурдонязе!
Гурь тов, поласкязе!
Медь ламбама цюкорнязе!
Гай, тула мандонязе!
Гай!
Гай!
Гай!
Гайфтезе коня ланга кяжи пона врьгазть мандоняса, путозе нурдоняв. А сонць тага морай.
Тяни каршезонза лиссь оцю пря офтсь.
— Ох, цёраня, кодама мазы мороце, морак тейньге.
— Мораса тейтьке, озак элезон да конить полкш сельмотнень.
Озась офтсь элезонза, конезень полкш сельмонзон, тусть курькстома.
Цёранясь морай:
Гурь сей, нурдонязе!
Гурь тов, поласкязе!
Медь ламбама цюкорнязе!
Гай, тула мандонязе!
Гай!
Гай!
Гай!
Гайфтезе коня ланга оцю пря офтть, путозе нурдоняв и тусь куду. Аляц стафтсь тулуп, врьгазонь ор, келазень вазь да воротник, а нинге нумолонь гальцят.
Ефксть пец ваясь ведьс.
[1] Келаськянь