Ик пӹрцы гӹц имни
![](/cache/8c/8c0cc36099736ad3d4f667f90779e70c.jpg)
Перви ик солашты ӹленыт вӓты дон мары. Нӹнын ик эргышты ылын. Шукат ак ӹлеп, эргын ӓтяжы колен кеа, варарак ӓважат кола. Рвезы шкетшы ӹла, ӹла, вара солавлӓ мычкы кеаш тумая. Сӱсек пындашышты тӹды ик пӹрцым моэш дӓ тӹ пӹрцы доно торцынжы лӓктын кеа.
Кеа, кеа, ик солашкы шоэш. Вады лин колта. Ик пӧртышкы амалаш пырташ ядеш:
— Кыва, амалаш пыртай! — манеш.
— Пыртышаш, пыртышаш! — манеш кыважы.
Рвезет вара попа:
— Эх, — манеш, — пӹрцем кышкы пиштышаш?
— Теве, — манеш кыва, — комбы виташ пиштема.
Вара рвезым пукша, йӱкта, амалаш пишта. Ирок кӹньылыт, рвезет вес солашкы кеаш йӓмдылалтеш. Комбы виташ пыра — пӹрцыжым кыван комбывлӓжы качкын колтеныт.
— Эх, кыва, — манеш рвезы, — пӹрцем комбывлӓэт качкын колтеныт!
— Пӹрцет вӓреш ик комбем нӓлок, — манеш кыважы.
Кыва ик комбыжым рвезылан кычыктен колта. Рвезы, комбым нӓлын, вес сола якте ашкедеш. Эчеат вады лин колта. Ик пӧртыш амалаш пырташ ядеш:
— Кыва, амалаш пыртай!
— Пыртышаш, пыртышаш! — манеш кыважы.
— Комбем улы, дӓ кышкы тӹдым колтышаш? — ядеш рвезы.
— Тевеш тӓга виташкем колтема! — манеш кыважы.
Рвезы комбыжым тӓга виташкы колта. Вара пӧртыш пыра. Кыва тӹдым пукша, йӱкта, амалаш пишта. Ирок кӹньылыт, рвезы пакыла кеаш тӓрвана. Тӓга виташкы комбыжылан пыра — комбыжым тӓгавлӓ логен пуштыныт.
— Кыва! Мам ӹнде ӹштышаш? Комбем тӓгавлӓэт логен пуштыныт! — манеш рвезет.
— Комбет вӓреш ик тӓгам нӓлок! — попа кыважы.
Рвезы тӓгам шур гӹд кӹлда дӓ пакыла ашкедеш. Кеа, кеа, эчеат ик солашкы шоэш. Вады лин колта. Ик пӧртьш амалаш пырташ ядеш:
— Кыва, амалаш пыртай!
— Пыртышаш, пыртышаш! — манеш кыважы.
— Тӓгаэм улы, дӓ кыш вара шагалтышаш? — ядеш рвезет.
—Тевеш имни виташ колтема! — манеш кыва.
Рвезы тӓгажым имни виташ колта. Вара кыва тӹдым пукша, йӱкта, амалаш пишта. Ирок кӹньылытат, рвезы пакыла кеаш тӓрвана. Тӓгажылан имни виташ пыра — тӓгажым имнивлӓ чымен шуэныт.
— Кыва, мам ӹнде ӹштем? Тӓгаэм имнивлӓэт чымен пуштыныт! — манеш.
— Тӓгаэт вӓреш ик имним нӓлок! — попа кыважы.
Рвезы тӓгажы вӓреш ик имним виден кеа. Корны мычкы кеа, кеа, пирым вӓшлин шагалеш.
Пирет рвезылан попа:
— Цецаш тӹньжымат, имниэтшымат качкын колтем!
— Ой, пиры тос, тырхалай! Мӹнь тӹланет тотлы гӹц тотлым пукшем! Шагал йӓ имни шайылан! — манеш рвезы.
Пиры имни шайылан шагалеш дӓ тотлы качкышым вычен шалга. Имниэт кок шайыл ялжы доно пирым ышмалу гӹц как чымал пуа, пирет колен тӹ кеа.
Рвезы колышы пирым имни тупыш пишта дӓ пакыла кеа. Кеа, кеа, корнышты мӧскам вӓшлин шагалеш.
— Мӹнь тӹньым дӓ имниэтым качкам! — мӧскажы манеш.
— Ой, мӧска тос, изиш тырхалай! Мӹнь тотлы гӹц тотлым пукшем! — лопа рвезет. — Тӹнь шагал имниэм шайылан дӓ вычал!
Мӧска имни шайылан шагалеш дӓ вычаш тӹнгалеш.
Имниэт кок шайыл ялжым чымалтен лӱктал колта дӓ мӧскан лепкам шелын шуа. Мӧска колен тӹ кеа.
Вара рвезет мӧскамат, пирымат имни тупеш артен шӹнда дӓ корны мычкы кеаш тӓрвана.
Кеа, кеа, шачмы солашкыжы толын шоэш. Тоныжы иктат уке. Тӹды пиры дон мӧска каваштым выжален колта. Вара ӹдырым нӓлын шӹнда. Рвезын ӹнде имнижат, вӓтыжат, пурлыкшат улы. Вӓтыжы доно коктын кӹзытат ӹлалтен колтат.