Кода пинесь эстейнза ялга мусь
Кати-мзярда кунара пинесь эрясь вирьса ськамонза. И арась ськамонза скучна. Тусь вирьге ялгань вешендема.
Мольсь, мольсь — каршезонза арды нумолня.
Пинесь тейнза корхтай:
— Нумолня, нумолня, аре марса эрятама.
— Мес мле, — корхтай нумолнясь, — аре.
Мусть вирьса эстейст васта и, кодак шоподсь, мадсть. Нумолсь матодовсь, а пинеть аф сай удомац, ушедсь увама. Нумолнять эстокиге явась удомац. Комотсь и корхтай пинети:
— Мес тон уват? Марятанза врьгаз, сай и кафцьконь сивсамазь.
Лоткась увамда пинесь, арьси: «Кальдяв ялгась повсь. Вов врьгазсь, сон, улема ни, кидовок аф пели».
И тусь пинесь нумолть эзда, тусь врьгазонь вешема.
Мольсь, мольсь вирьге, вдруг каршезонза врьгаз арды. Корхтай тейнза пинесь:
— Кулхцонтт, врьгаз, аре марса карматама эряма.
Врьгазсь мярьгсь:
Мес мле, кафонек сяда весяла.
Шоподсь, срхкасть удома. Врьгазське мадсь, пинеське мадсь.
А самай пялевеста сргозсь пинесь и увазевсь. Эводсь врьгазсь, ваймоц кочкярязонза тусь, ушедсь пинеть сюцема:
Мезе тон уват? Вов сай офта и сивсамазь кафцьконь.
«Ну, — арьси пинесь, — врьгазське аф вии, раз офтта пели. Улема, офтсь богатырь, сембода вии».
Кадозе пинесь врьгазть и тусь офтонь вешема. .Тага моли вирьге. Мольсь, мольсь, и каршезонза васедсь офта. Мольсь пинесь малазонза и корхтай:
— Эй, офта-богатырь, аре марса эрятама.
Согласиндась офтсь. Шить ётафтозь. Сась весь. Офтсь нувазевсь. А пинесь пялеве пингста кармась увама.
Сргозсь офтсь, эводсь, ваймоц кочкярязонза тусь. Ушедсь пинеть сюцема.
— Лоткак, — корхтай, — мезе уват? Марятанза ломань, сай и шавсамазь кафцьконь.
«Ну, — арьси пинесь, — тявок пели. Сави ломань вешемс».
И ворьгодсь пинесь офтть эзда.
Арнесь, арнесь, сембе вирть арнезе, а ломань аш. Лиссь сон вирть трвас и озась ваймама. А ломанць самай тя пингть мольсь вири пенгас. Тяса и васьфтезе пинесь сонь. Ардсь тейнза и корхтай:
— Ломань, а ломань, аре марса эрятама.
Ломанць мярьгсь:
Мес мле, аде мархтон!
И сявозе пинеть кудозонза.
Вов шоподсь , ломанць мадсь. Пялевеста пинесь ушедсь увама. Сргозсь ломанць и ювадсь:
Эй, пиненязе, кда вачедат — ярхцак, а тейне удомс тят шоря.
Пинесь шарьхкодсь, ярхцась и мадсь. Тя пингста сявомок ломанть мархта и лядсь. Тячемс эряй.
Тяса ёфксть пецка.