Лемь парьне
Ве овт’ эстензэ кудо путсь. Овто таштакшность цэла парь лемь. Трясь-вантсь эснэнзэ кудо потмарсо. Ривезьке неизе сонзо лемне парнесть.
Весть ривезьке овтонень сась. Овто паро чи, овто паро чи! нолдамака монь гак эсь кудозот эрямо. Овто корты тензэ: иля, вейс’ эрямс тесна! — Арась, овто паро чи! минь тонть мартот боярт боярават эрямо карматанок. Овто ривезькень нолдызе.
Вана кармасть сынь вейс’ эрямо. Эрить-аштить ёнсто—боярть боярават. Овто сизи, пецька лангс кузи; ривезьке яла вальм’ ало, вальма лангс’ озадо ашти. Весть ист’ овто куйсь пецька лангс, ривезьке озадо ашти вальма лангсо, сонсь вальмас пулосонзо стуки. Овто пецька лангсто пижакадсь: ки тосо стуки?—Вана, овто паро чи, монь кисэм састь: кумакс тердить эснэм, — молям, эл’ арась? Овто мерсь тензэ: азё, я. Ривезьке тусь. Сон кудо потмарс куйсь, овтон лемне парнензэ муизе; кармась лемезьде ярсамо. Ярсась, ярсась, мекев валгсь кудо потмарозде; совась кудось. Овто кевстизе: я, кода лемезэ?—Ушодкске! Омбоце чистэ ривезьке таго (опеть) пулосонзо вальмась стуки. Овто пецька лангсто пижни: ки тосо стуки?—Опеть монь кисэм састь: кумакс тердить эснем, — молян, ел’ арась? Азё, я, мерсь овто. Ривезьке чiезь тусь кудо потмарс. Сон тосо пелензэ лемнесть сэвизе да мекев кудос валгсь. Овто кевстизе: я, кода лемезэ?—Пелякшкине. Колмоце чистэ ривезьке таго пулосонзо вальмас стуки; овто пецька лангсто кежевстэ сергедьсь: да ки тосо стуки?—Овто паро чи, опеть монь кисэм састь: кумакс тердить эснэм—молян, эл’ а молян? Азё, я. Ривезьке кудо потмарс чiезь куйсь. Сон тосо лемне парнесть потмаксос сэвизе да мекев кудос валгсь. Овто кевстизе: я, кода лемезэ?—потмакскине! Нилеце чистэ як ривезьке кармась пулосонзо вальмас стукамо. Овто кежевстэ эчкэ вальгейсэ кода пижакады: ки тосо таго стуки?—Монь кумакс тердить—молян, эл’ а молян? Азё, я! Ривезьке седе курок чiезь куйсь кудо потмарс, леместь весе сэвизе; парнесть шлизе, нардызе, лаз лангс комавтызе. Мейле кудос совась. Овто кевстизе: мейсь истя, ривезьке паро чи, чече кувать якить? Я, кодамо лемь путыде?—Шлявкске-нардавкске—лазнэ ленгс комавкске!
Таго зняро шкадо мейле овто ривезькеде салава кудо потмарс лемензэ содавтомо куйсь. Вана ваны сон—лем парнезэ комавтозь ашти. Сон кудо потмарозде валгсь да кода педи ривезькестень: ривезьке, а ривезьке, тон сэвик монь лемне парем?! —Арась, овто паро чи, мон эзинь ярсне, эзинь сэвнек тонь лемле парнесть! Овто мери: айдо кардайс, керьне лангс венелев листяно: конатамок вацензэ улить лемевть, севате леместь сэвизе! Ривезьке мери: я, пандя сёвномом; ино паро, мольдяно; сернемстэнек ансяк удалов а ваномкс. Сынь керьне лангс венелев лисьме ландясть: мукорсост ве ёнов кавнеск ландясть. Овто кодак ландясь, а вачты, прясонзо сыркс а мери; ривезькесь се шкане пулосонзо сонсинзэ вацьтнень овт’ алов кшумаи, овтонсетнень эсенз’ алов ускси. Кода серневсть, ривезьке мерсь овтонень: я, пандя, ней стятанок—стясь. Ривезьке мери: я, вана, дурак овто, тон монь лангозом каить; вана тонь тонсеть вацеть лемевть, монь равужот…