Ефкскя

Эрясть-ащесть атя и баба. Синь ульсь стирнясна, цёранясна, тракскасна, мацинясна и утканясна. Эрясть лац. Стирнясь ведь канни, цёранясь атять мархта вирьста пенгат ускси, бабась сембе понат кштирди да кодай носокт, варягат, а илять озайхть марняс и морайхть: всякай морот морасть, а фкя морось ульсь цебярь, стама протяжнай, мзярда морайхть, прям-таки седице сяряди:

А кинь тяни оцю горяняц?

А кинь лядсь апак сокак

Равжа моданяц.

А кинь тяни оцю горяняц?

А кинь лядсь апак нук

Ума сёроняц.

А кинь тяни оцю горяняц?

А кинь аяш ни

Аляц-тряйняц.

Синь фкакс тя мороть морсезь.

А вирьса эрясь офта — оцю, страшнай, сельмонза толкс палыхть, пейнза кувакат, оржат, кода пеельхть. Сембе вирть эзга якай и веши, мезьда ярхцамс. Якай и офтокс морай:

Бо, врьгаз, бо, нумол,

Вирьге-шяйге якан.

Бо, врьгаз, бо, нумол,

Шяймарьняда ярхцан.

И кие аф кульсы сонь мораманц, сембе кяшендихть.

И вов весть бабась и атясь удыхть, синь пря песост стирнясна, пильге песост цёранясна, утом ала утканясна, утомса мацинясна, кудонголе тракскасна. Удыхть лац, цебярь он няихть. Веть атясь сргозсь и кули, кие-бди якай, ваны вальмяти — офта калдазса якай. Якась и ушедсь пандста курькснема. Курьксни и морай:

Гурь сей, саласкяй,

Гурь тов, поласкяй,

Медь ламбама сускомня,

Атят-бабат сирет кудса,

Пря песост стирнясна,

Пильге песост цёранясна,

Утом ала утканясна,

Утомса мацинясна,

Кудонголе тракскасна.

— Атяй-бабай, максость тейне утканянтень: ярхцамазе сась.

Атясь и бабась эводсть и максозь утканяснон. Офтсь фатязень синь, сивозень и тусь вири ваймама.

Шобдава сембе стясть, идьморхне лиссть калдазу, а утканясна аш, ушедсть авардема. Сембе авардихть; лоткасть, и тага кажнайсь ушедсь эсь тевонзон тиема.

Омбоце веня офтсь тага сась. Курьксни и морай:

Гурь сей, саласкяй,

Гурь тов, поласкяй,

Медь ламбама сускомня,

Атят-бабат сирет кудса,

Пря песост стирнясна,

Пильге песост цёранясна,

Утомса мацинясна,

Кудонголе тракскасна.

— Атяй-бабай, максость тейне мацихнень.

Атясь сргозсь, кизефтезе бабать: «Мезе карматама тиема?»

А бабась отвечась:

— Максыть, может, сон вишконяста туй и аф сай.

Атясь максозень мацихнень. Офтсь фатязень синь и ласькозь тусь вири, a тоса синь сивозень. И кажнай веня ушедсь офтсь якама пялост. Колмоце веня сась и тага морай:

Гурь сей, саласкяй,

Гурь тов, поласкяй,

Медь ламбама сускомня,

Атят-бабат сирет кудса,

Пря песост стирнясна,

Пильге песост цёранясна,

Кудонголе тракскасна.

— Атяй-бабай, максость тейне тракскять.

Атясь и бабась эводсть и максозь тракскять. Офтсь тракскять фатязе, вири кандозе, сивозе. Веть тага сась и тага курьксни и морай:

Гурь сей, саласкяй,

Гурь тов, поласкяй,

Медь ламбама сускомня,

Атят-бабат сирет кудса,

Пря песост стирнясна,

Пильге песост цёранясна.

— Атяй-бабай, максость тейне стирнянтень.

Бабась аварди, атясь аварди, цёранясь аварди.

Мезе тиема, пелихть офтть эзда. Максозь стирнять, офтсь сонь фатязе, стирнясь аварди, а сон вирти кандозе и сивозе.

Сяда тов веть «в следующую ночь» офтсь тага сась офтсь тага сась. Курьксни и морай:

Гурь сей, саласкяй,

Гурь тов, поласкяй,

Медь ламбама сускомня,

Атят-бабат сирет кудса,

Пильге песост цёранясна.

Сргозсть сембе, эводсть. А офтсь тага корхтай:

— Максость тейне цёранянтень, а кда аф макссасть цёранять, то сембонь сифтядязь.

Аш месть тиемс, максозь цёранять. Офтсь фатязе цёранять, кандозе вирти и сивозе. И тага сась сон, курьксни и морай:

Гурь сей, саласкяй,

Гурь тов, поласкяй,

Медь ламбама сускомня,

Атят-бабат сирет кудса.

Морась, морась, а атять мархта бабась эводсть и авардихть. Офтсь учсь, учсь — пильгонц эса кодак кенкшть тозордасы, и кенкшсь синдевсь. Офтсь сувась кудти, фатязень атять мархта бабать и тусь вири. Вири кандозень и сивозень. Сивозень и почкодсь.

Почкодсь, а эздонза лиссть цёранясь, стирнясь, атясь, бабась, сембе и авардихть, и рахайхть. Састь куду и тага кармасть эряма лац, а офтть кеденц сявозь и плхтазь.

Мон тоса улень, винада симонь, усанень эзга шудесь, а кургти ашезь пова.