Льӧль сяська

Кемалась ни вылэм со. Одӥг пичигес гинэ удмурт гуртын улэм пересь воргорон. Солэн вылэм чиед гинэ Ондӥ нимо пиез. Аръёс ортчемъя, пересь доры матэктыны кутскем кулон но. Соку со пизэ дораз ӧтем но тазьы верам:

— Шудо луэмед ке потэ, котькинлы тыршы умой уж лэсьтыны. Ӟечсэ уз вунэтэ.

Мукет номыр верамтэ ни со. Кӧня ке нунал ортчыса люкиськем югыт дуннеен, нош Ондӥлы огназлы мӧзмыт потэм — дасясысем сюрес вылэ.

Мынэ, пе, со шур кузя но ас понназ кырӟа:

— Шулдыр вордскем палъёсы,

Но мӧзмыт мыным.

Оло, шуд шедьто аслым

Мукет шаерын.

Кырӟамзэ кылэм пересь кышномурт.

— Валасько, пие,— шуген вамышъяса лыктонъяз, пе, шуэ со,— сюлэмад секыт кайгу вань. Ма бен луиз тонэн сыӵе?

— Атае кулӥз мынам, пересь, нош мон огнам кыли. Табере, тани, потӥ аслэсьтым шудме утчаны.

Бен, кайгуэд пичи вылымтэ, но тон мыным боды лэсьтыса уд сёты-а, чик ӟигары уг тырмы ни.

Ондӥлэн тодаз лыктэм атаезлэн верам кылыз: «...Котькинлы тыршы умой уж лэсьтыны». Бадяр ваез чигем но пересьлы боды лэсьтэм. Соиз пилы возьматэм сюрес, кудӥз сое шудэз доры вуттоз.

Вамыштэм Ондӥ азьлань. Мынэ, мынэ, пе, но — шӧдтэк шорысь кышкыт кесяськем кылэм. Учке но: Луд Кеч кык пыд йылаз сылэ, адями куараен, пе, вазиське:

— Юртты мыным, егит пи, ватскыны. Ӝоген татчы сьӧд кышномурт, Нюлэс Ош, лыктоз. Со монэ виыны турттэ.

Озьы вераса вуттэм гинэ — кызъёс сьӧрысь адскем кышкыт пересь кышно — ымнырыз сьӧд, пиньёсыз кузесь, нош синъёсыз писэйлэн кадь, пе, ӝуало. Кема жугиськоно луэм таин Ондӥ. Озьыке но, вормем. Луд Кеч солы тау карем но сюрес возьматэм.

Вуэм Ондӥ ошмес дуре. Куара, пе, кылэ:

— Ӝут, Ондӥ, монвӧзысь изэз, мыным потыны секыт.

Басьтэм со ошмес вӧзысь изэз. Отчы соку ик льӧль сяська кылдэм. Пияш мыкырскем со доры но маялтэм. Соку ик со азе, пе, чебер ныл кылдэм — сыӵе чебер, кыӵезэ Ондӥ ноку адӟылымтэ на.

— Монэ вегин кышно тазьы кариз — сяськалы пӧрмытӥз но изэн ӵоксаз. Тау тыныд, Ондӥ, мозмытӥд монэ,— шуэм со.

Пи синмаськем солы. Озьы соос ӵош улыны кутскиллям, выль корка пуктӥллям. Нош укно дуразы, пе,— котькуд гужем но тулыс ӝужась льӧль сяська. Та семьялэсь шудо но тупаса улэмзэ возьматыса будэ со.