Шайтан

Одӥг пӧйшурась сӥзьыл сике пӧйшураны кошкем. Лумбыт пыӵалэн калгыса, нокинэ но виымтэ. Уин со липет улэ кӧлыны интыяськем. Малпамтэ шорысь уйшор даур со доры адями йыгаське:

— Лэзь, юлтоше, кӧлыны.

— Кӧл,— шуэм пӧйшурась,— инты бадӟым, кыкнамылы тырмоз.

Адями пӧйшурась вӧзы ик выдэм. Учке со шоры пӧйшурась — кышкаса куалекъя: синъёсыз кышкытэсь, дӥськутэз лусьтро. Котькызьы учкы — урод адями тусо. Пӧйшурасьлы со шуэ:

— Мон умме уси ке, котырысьтым пар потоз.

Умме усиз. Зэм ик, бордысьтыз пар потэ. Пӧйшурась шӧектэм кадь кылле, та адями Шайтан, дыр, кожаса, умойтэм ужен лыктэм маке. Со каллен гинэ сукманзэ кылем но ас интыяз пуклёкез дӥсяса кельтэм. Ачиз потэм. Ӝужыт кыз йылэ тубем но учкыса улэ: ма луоз ини?

Шайтан сайкам, сукманэз адӟем:

— Нош тон татын на-а ма?

Корт кутэм но сое ӟырдатэм. Кутскем ук сукманэз пӧськортнаны! Ӵужыр-р, пе, сутэ, пӧйшурасез сутӥсько кожаса. Пырак сутыса пась карем, серекъя, пе, шумпотэ. Кыз йылысен адями ваньзэ адӟем.

Югыт луыку, Шайтан беризь гырке пегӟем. Соку пӧйшурась васькем но со гырке ӝуась сэрегпум донгем. Шайтан, пе, шумпотыса вера:

— Ой, ӵукна шунды макем шунтэ!

Беризь сутскыны кутскем бере, со вузыны ӧдъям:

— Быдтӥд улонме тон, уром!

Озьы быдтэм адями Шайтанэз.